Eurak bidean familientzako
Ongi etorri Bilboko Guggenheim Museora!
Ez galdu aukera eraikin harrigarri hau bisitatzeko eta bertan ikusgai dauden artelan zoragarriak ikusteko. Ibilbide honetan proposatzen dizkizuegun artista guztiak emakumeak dira, ideia bikain eta ausartak dituztenak,… esploratzaileak bailiran!
Ama armiarma bat da?
Terraza itsasadarraren ondoan.
Museora sartu, igaro Atriotik eta irten terrazara. Hemendik, hurbiltzen ari dela dirudien armiarma erraldoi bat ikusiko duzu.
Louise Bourgeoisi material desberdinekin lan egitea eta ikuslea inguratzen eta babesten duten lanak egiteko bideak esploratzea gustatzen zitzaion. Ama armiarma handi bat da, brontzez egina eta hanka luze eta finekin.
Zergatik deitzen da eskultura hau Ama? Ama bat gogorarazten dizu? Artistaren amak tapizak ehuntzen zituen, hariz ehundu ere, armiarmek bezala!
Museotik irteten zaretenean, hurbildu Ama eskulturara, jarri haren azpian eta begiratu gora. Zer ikusten duzu? Zergatik uste duzu artistak hori gehitu zuela?
Louise Bourgeois, Mamá (Maman), 1999
Brontzea, marmola eta altzairu herdoilgaitza
927 x 891 x 1023 cm
Guggenheim Bilbao Museoa
Pentsatu desio bat
Terraza, bigarren solairua.
Yoko Ono interes asko dituen artista japoniarra da: artea, zinema, musika… Eta dena esperimentu bat balitz bezala egiten du, esplorazio bat bezala!
Bakearen, giza eskubideen eta emakumeen eskubideen aldeko aktibista ere izan da.
Munduko bakearen aldeko obra da hau, eta zuek ere parte har dezakezue. Batzuetan, bake-nahiak idatzi eta eskegi ditzakezue. Beste batzuetan, zuhaitzari xuxurlatu diezaiokezue zuen nahia.
Animatu eta parte hartu!
Yoko Ono, Bilborako nahien zuhaitza (Wish Tree for Bilbao), 1996/2014
Eskuz idatzitako eta markoztatutako testua, olibondoa, lurra, zurezko loreontzia, atrila, etiketak eta boligrafoak
Neurri aldakorrak
Guggenheim Bilbao Museoa
A zer koloreak!
305 egongela,hirugarren solairua.
Lee Krasner margolari iparramerikarra izan zen eta artean trebatzeko ahalegin handia egin zuen.
Espresionismo Abstraktua izeneko mugimendu artistikoaren aitzindaria izan zen. Mugimendu horretako artisten helburua barruko emozioak eta sentimenduak adieraztea zen, ez zituzten benetako objektuak irudikatu nahi.
Lee Krasner beti zebilen margotzeko modu berrien bila. Pintzelkada indartsuak eta kolore bizi eta distiratsuak zituzten lanak egin zituen. Pintura hau duzue horren erakusgarri!
Gainera, margolan honek izenburu bitxi bat du: “Palingenesia”. Badakizu zer esan nahi duen? “Berriz jaiotzea” esan nahi duen grezierazko hitz batetik dator. Zer uste duzu esan nahi digula artistak horrekin? Zer sentiarazten dizute kolore eta pintzelkada horiek?
Lee Krasner
Palingenesia (Palingenesis), 1971
Olio-pintura mihise gainean
208,3 x 340,4 zm
Pollock-Krasner Foundation, New York
¿Zenbat aurpegi ikusten dituzu?
303 egongela, hirugarren solairua.
Andy Warholek bere artelanen gaitzat pertsona ospetsuen eta eguneroko bizitzako era guztietako objektuen irudiak aukeratzen zituen: elikagaienak, garbiketa-produktuenak,…
Lan honetan Warholek Marilyn Monroe aktore, abeslari eta modeloa irudikatzen du; bere garaian oso ospetsua eta ikono handia izan zen emakume ausarta.
Aktoresaren aurpegia ehun eta berrogeita hamar aldiz errepikatzen da! Nola egin zuen? Serigrafiari esker. Serigrafia txantiloiak erabiltzen dituen estanpazio-teknika da. Tintaz egindako marrazki edo trazua serigrafia-pantaila edo -bahe bat erabiliz nahi bestetan inprima daiteke modu askotako gainazaletan.
Andy Warhol
Ehun eta berrogeita hamar Marilyn koloretsu
1979
Akrilikoa eta serigrafia mihise gainean
201 x 1.055 x 6 cm
Guggenheim Bilbao Museoa
Ikusten nauzu, ez nauzu ikusten?
301 egongela, hirugarren solairua.
Cristina Iglesias artistak pertsonengan pentsatuz sortzen ditu bere eskulturak, tamaina handikoak izan arren.
Ikusleak bere eskulturetan “bizitzea” eta guregan sentsazio bereziak eragitea gustatuko litzaioke.
Gaztelaniazko jatorrizko tituluak, Celosía, leihoetan jartzen diren itxiturei egiten dio erreferentzia.
Imajinatu nola ikusten diren gauzak barrutik!
Cristina Iglesias
Titulurik gabea (Sareta II) [Sin título (Celosía II)], 1997
Zura, erretxina eta brontze-hautsa
274 X 270 X 251,5 zm
Guggenheim Bilbao Museoa
Bla, bla, bla
Hirugarren solairuko balkoia.
Jenny Holzerrek hitzak erabiltzen ditu adierazteko bide gisa. Bere lanetan gerren kontrako eta pertsona ahulenen aldeko mezu laburrak irakur ditzakegu, baita Holzerren pentsamenduen eta sentimenduen inguruko mezuak ere.
Mezuok partekatzeko, eta arreta erakartzeko, oso euskarri originalak erabiltzen ditu, hala nola: pantaila elektronikoak, proiekzio erraldoiak, errotulu digitalak eta baita marmol hotzez egindako bankuak ere!
Balkoiko barandara kontu handiz hurbildu. Pertsona helduren batek mugikorrarekin LIKE BEAUTY IN FLAMES lan digitala ikusteko aplikazioa deskarga dezan animatzen zaituztegu.
Holzerrek errealitate areagotua erabiltzen du eraikinarekin “hitz egiteko”. Errealitate areagotuko bi obra Museo barrualdeko eta kanpoaldeko kokapen zehatzetan aktibatzen dira; eta hirugarrena munduko edozein tokitatik aktiba daiteke!
Jenny Holzer
Like Beauty in Flames
2021
Errealitate areagotuko aplikazioa
Guggenheim Bilbao Museoa
XX. eta XXI. mendeetako emakume artista garrantzitsuenen lanak ikusi berri dituzue. Askoz ere gehiago daude! Ziur gaude gehiago ezagutu nahi izango dituzula!
Espero dugu esperientzia honekin gozatu eta ikasi izana. Laster arte!
