Jarrai gaitzazu:

Euskara   |   Español   |   English   |   Français

Inicio
Menua

La Médusen almadia

José Manuel Ballesterrek Arte Ederretako lizentzia jaso zuen 1984an, Madrilgo Complutense Unibertsitatean. Lehen lanak XV. eta XVI. mendeetako Italiako eta Flandesko eskolen tekniketan oinarritu ziren. 1990. urtean pintura eta argazkiak uztartzen hasi zen eta, ordutik hona, haren lanetako asko barne zein kanpoko arkitektura-espazioen irudikapenak dira. Argazkigintza Sari Nazionala jaso zuen 2010ean, “arkitektura-espazioaren eta argiaren interpretazio apartarengatik eta argazkigintza-tekniken berrikuntzari egindako ekarpen bikainarengatik”.

Ballesterren iritziz, argazkigintzaren garapen teknologiko azkarrak arte-munduari gertuagotik begiratzea ahalbidetu die artistei zein ikusleei. Ballesterrek denbora kapsulatzea, etetea, bilatzen du argazkiaren bidez. Horretarako, ikuslea bizitzaren joan-etorrietatik ateratzen du, ez-espazio arkitektonikoetan murgilduz. Ballesterren xedea dira espazio hutsak, asmo du jendea beren arrasto eta islen bidez erretratatzea. Norbanakoaren bakardadea eta mundu modernoaren kontraesanak aztertzeko arkitekturaz baliatzen da, espazioak eszena artifizial bilakatzen ditu. Argiak leku garrantzitsua dauka, ezkutua eta ikus daitekeena, publikoa eta pribatua, gizakia adierazteko osagaiak baitira. Formatu handiko argazkiek interpretazio-aukera zabala eskaintzen dute; Ballesterrentzat, lanak ikuslea errealitatearen metamorfosian parte hartzera gonbidatzen du.

Ballesterrek espazio hutsaren poesia bilatu nahi zuen, eta hori izan zen Ezkututako txokoak sortaren iturburua. Artearen historiaren maisulanen interpretazioak dira: iraganeko pinturen argazkiak digitalki landu ditu, hutsune kezkagarriak sortzeko helburuarekin. Théodore Géricaulten La Médusen almadia (1818–19) lanak, besteak beste, iragan mendetako pinturak aztertzeko aukera eman dio Ballesterri, bere historia-aroari muzin egin gabe. Géricaulten La Médusen almadia lanak, Frantziako erromantizismoaren ikurrak, 1816an Mauritaniako kostaldetik gertu jazoriko Frantziako ontzi baten urperatzea irudikatzen du. Ehun lagunetik gora ur gainean egon ziren hala nola egindako almadi batean, zenbait egunez, eta hamabost besterik ez ziren bizirik irten. Ballesterren argazki-berrazterketak baltsaren hondarrak azaltzen ditu, jenderik gabe, bizirik irten zirenen erreskatea eta gero. Hildakoen hilotzak desagertuta zeuden ordurako ere. Francisco de Goyaren 1808ko maiatzaren 3ko fusilamenduak lanaren inguruan egindako berraztertzearekin gertatzen den antzera, Ballesterren La Médusen almadiak lanak jendearen irudimenean bizirik gordetako historia-gertakarietako bat gogoratzen digu.

José Manuel Ballester

La Médusen almadia (La balsa de la Medusa), 2010

Inprimatutako argazkia mihise gainean

491 x 717 cm

Edizio bakarra
Guggenheim Bilbao Museoa

×